Udupila, Wickramasinghe Family: උඩුපිල ගල

උඩුපිල ගල Udupila Rock

---උඩුපිල ගල---

මා පෙනී සිටි සාමාන්‍ය පෙළ විභාගයේ දී විද්‍යා ප්‍රශ්න පත්‍රයේ (1980) මෙවැනි ආකාරයේ ගැටළුවක් විය. සේදූ ඇඳුමක් ඉක්මනින්ම වේලෙන්නේ අව්වේ වැලක වනා තිබෙන විටද, කළු ගලක් මත අව්වේ තැබූ විටද? ඔබේ පිළිතුරට හේතු පැහැදිළි කරන්න. මම කිසිම පැකිලිමක් නො මැතිව එම ගැටළුවට පිළිතුරු ලීවෙමි. ඒ, එය අත්දැක තිබීම හේතුවෙනි. ගලේ රෙදි වැනීම අප නිරතුරවම අත්දුටුවේ උඩුපිල ගලෙනි. නාන ලිඳෙන් සෝදාගෙන එන ඇඳුම් වනන්නේ ගලේය. ගලේ බොහෝ තැන් තැනිතලා ලක්ෂණ සහිතව පිහිටා ඇත.

දිගට පැතුරුණු ගලේ හතර වටින් ම වවා තිබුණේ රබර් ය. මහගෙදරට ඉදිරිපසින් පැත්තේ පොල් ගස් කිපයක් ද විය. මහගෙදර ඉදිරිපසින් බලන විට දකුණු කෙළවරින් දළ බෑවුමක් සහිතව ද, වම් කෙළවරින් මද බෑවුමක් සහිතව ද තිබූ බෑවුම්, ගල මතට ප්‍රවේශ වීමට තිබූ මාර්ග විය. නාන ලිඳේ සිට එන විට ආසන්න නිසා ද, මද බෑවුම නිසා ද, මද බෑවුම් සහිත ප්‍රවේශය නිතරතුරුවම භාවිතා විය. ගලට ගොඩ වූ වනම වම්පසින් ගල් වලක් විය-එහි වතුර කිසිදා සිදී නොගිය බව අසා ඇත. නොගැඹුරු බැවින් එහි බැස ඇවිද යා හැකිය. සුදු පෙණ කැටි මෙන් ගෙඹි බිත්තර තැනින් තැන දැකිය හැකි විය - ඉස්ගෙඩි පිරී සිටියේය.

දකුණු පස දළ බෑවුම් ප්‍රවේශයේ තවත් ගල් වලක් විය. එය ද ජලයෙන් පිරී තිබුණු අතර බැස ඇවිදීමට තරම් සුදුසු තත්වයේ නොවිණ. මේ ගල්වලවල් දෙකෙහිම විවිධ ජලජ ශාක වර්ග දක්නට ලැබිණ. ගල මත ද වැසි ජලයෙන් පිරෙන කුඩා ජල වලවල් කීපයක් තිබුණු අතර ඒවා පායන කාලයේ දී සිඳී යයි.

ගල පුරාම අක්කපාන වැවී තිබිණ. අක්කපාන පොහොට්ටු ඇඟිලි තුඩු වලින් පොඩි කර ඇසෙන ශභ්දය ඇසීමට අපි මහත්සේ ඇළුම් කළෙමු. තවද ගල වටේ ම විවිධ ශාක වර්ග වැවී තිබිණ.

ගලේ සෙල්ලම් කළ මතකයන් චන්ද්‍ර නැන්දා (ශ්‍රීමති වික්‍රමසිංහ/රාජපක්ෂ) අවදි කරන්නේ මෙසේය.

ගල උඩ ඉස්කොලෙ දමා

සුදු හාමිනෙ අක්කා එක්ක

අක්කපාන ලමයින් හට

ඉගැන්නුවා ගුටි ගහ ගහ

නෝනා අමරෙ අපි හැමදෙන

ගල උඩ ඉස්කොලේ ගියත්

අක්කපාන ගුරුවරියයි

පට බැදුනා නමක් ඇයට

ඉස්කොලේ ලොකු නෝනා

සුදු අක්කා උනා නිතර

මම තව ගුරුවරියක් විය

අමරෙ බනිස් කාරයා විය

ගල උඩ අතු පැතිර තිබුණු

කජු අතු උඩ වාඩි වෙලා

සෙල්ලම් ගෙදර වල් සේම

ඉස්කෝලද පැවැත් උනා

සෙල්ලම් ගෙය toilet එක

සේරම ගල උඩ සිදු විය

ලංකාවක හැඩය ගත්තු

ගල්වල ජල සැපයුවේය

ගලෙන් එහා පැත්තෙ තිබුණු

කොහොල්ලෑ ලාවුළු ගහයට

වැටී තිබුණු ඉදිච්ච ගෙඩි

සෝදන්නෙත් නැතිව ම කෑවා

ඊට මෙහා පැත්තෙ තිබුණු

ගල් දෙබොක්කෙ ගොරකා පැලේ

කොල දෙක තුන අපේ කටට

ගිය හැටි මට මතක තියේ

අම්මලාගෙ පරණ සාරි

ඇදගෙන ගල උඩට වෙලා

අශෝකමාලා සාලිය

රඟ දැක්වූ වා නිතරම

(2020-1-01-15)

හංසක වික්‍රමසිංහ තම අත්දැකීම් මෙසේ කියයි

කිරිල්ල ගෙඩි උණ්ඩ දමා බට ලී දඬු තුවක්කුවට

ඇඹුල් පේර දුන්නෙන් විද යුද්ධ කලෙමු බෙදී දෙකට

අව්ව වැස්ස දෙක නොබලා ගල පුරාම නැටුව පිනට

පතබෑවී ගල මත්තේ තකදපුලා ගතිමු එමට

ගංගා අක්කා (රේණුකා) ගල උඩ පාඩම් කරන බව මතක් කර සිටින අතර, ගල් ඉබ්බෝ ද සිටි බව පවසන්නී ය.

ගෙම්බන්ගේ ජීවන චක්‍රය නිරීක්ෂණය කළ බව උක්කුං නැන්දා (කිත්සිරි වික්‍රමසිංහ/හේවාගීගන) මතක් කර සිටින්නීය.

තමල් හෙවත් හාමිනේ නැන්දා (වික්‍රමසිංහ/ලියනගේ) කුඩා කල දළ බෑවුමෙන් ඇද වැටී නළලේ ඇති වූ තුවාළ කැලල තවමත් නැන්දාගේ මුහුණේ දක්නට තිබේ.

ලොකු අයියා (ප්‍රේමසිරි වික්‍රමසිංහ) කේන්තිගොස් කෑගසාගෙන එන විට අපි නතර වන්නේ (එනම් දුවලා ගොස්) ගලේ බව බන්ටි නැන්දා පවසයි.

තට්ටු කළ විට දෝංකාරය වන තැන නිධානයක් ඇතැයි මතයක් තිබූ බවට අයියා (නිශාන්ත වික්‍රමසිංහ) කියයි. එහි අභ්‍යන්තරයේ මැණික් වර්ගයේ පාෂාණයක් ඇති බවට ද මතයක් පැවතුණි.

ගලේ රෙදි වැනුවේ මහගෙදර අය පමණක් ම නොවේ. පුංචි සීයාගේ පවුලේ අය ද නාගෙන එන විට ගෙනෙන රෙදි ගලේ වනාගෙන යති. ඒ ඔවුන්ගේ ගෙදරට පිටුපසින් යන මාර්ගය තිබුණේ ගලේ දළ බෑවුම ඉදිරියෙන් බැවිණි.

දළ බෑවුම ඉදිරියෙන් කුඩා පොල් ගස් දෙකක් විය. මම නොඋස් ගසට නැග කුරුම්බා කඩන අතර උපුල් අයියා ගෙඩි අල්ලන්නේ බිම වැටෙන විට එම ශභ්දය ආච්චීට ඇසේවි යන සැකයෙනි. උපුල අයියා පිහියක් හොරෙන් ගෙන එන අතර, අපි දළ බෑවුමෙන් ගලට නැග කුරුම්බා බී, ඒවා පළා ලොඳ කෑවෙමු. පිහිය අක්කපාන ගාලක සඟවා එන්නේ මීලඟ දිනයේදීත් කුරුම්බා කෑමටය. ඓතිහාසික වටිනාකමක් ද ඇති මෙම ගලේ කෙටු අකුරු ද- රූප ද ඇති බව ලියා එවා පිටපත් කළ අකාරයක් දක්වා නිර්මාණය කළ බොරු විස්තරයක් මා කළ පත්තරේක අත්රේකයක් ලෙස සකසා අමර බාප්පාට ද බලන්නට දුන්නා මතකය.

මේ අනුව දන්නා පරිදි පරම්පරා දෙකක් මෙම ගලින් විවිධ අත්දැකීම් ලබා ගත් බව පෙනෙන්නට තිබේ.

න.දී.

පහත ඡායාරූප නිශාන්ත වික්‍රමසිංහ විසිනි 2021 ජනවාරි ලබා ගත් ඒවා ය.

මහ ගෙදරට පිටුපා සිටින විට - දකුණෙන් හා වමෙන් තිබූ ගල උඩට නැගීමට තිබූ පාරවල් තිබූ තැන්. (Panorama photograph)

දෝංකාරය වන තැන හෙවත් නිධානය ඇතයි කියන තැන (මහ ගෙදර මගේ දකුණු පසින්)

මහ ගෙදරට පිටුපා, ගලට මුහුණ පා සිටින ව්ට වම් පැත්තෙන් තිබූ ගලේ පොකුණ. දැන් එතන තියෙන්නේ සය්ප්‍රස් ගහක්.

උඩුපිල ගල උඩ ඇති අක්කපාන මල්

මහ ගෙදරට පිටුපා සිටින විට - දකුණු පැත්තෙන් තිබූ ගල උඩට නැගීමට තිබූ තැන. දැන් එතන තියෙන්නේ කොස් ගහක්

9:43 PM, 1/26/2021] තුල්සි අයියා:

Nature has won.

Harmony has lost.

[9:53 PM, 1/26/2021] නිශාන්ත අයියා:

උඩුපිල ගල උඩ පුරාම පාහේ කජු ගසක් පැතිරී ඇත. වටාපිටාවෙත් ගස් පඳුරු වැවී ඇති අතර තෙත් කලාපයේ කුඩා වන ලැහැබකට සමානය.

විශාල නයෙක් හා සුදු පැහැති නයෙක් එහි දැනට නිතරම සැරිසරන හෙයින් හා ගොම්මන් වෙලාවේ (හවස 5:30ට පමණ) තවත් සතුන් සර්පයන් එලියට බහින හෙයින් වැඩියෙන් ඇවීදීම නොකළෙමි.

[10:36 PM, 1/26/2021] ලොකු නිල්මිණි අක්කා:

හරිම ලස්සනයිනේ. සින්හරාජෙ ගියා වගෙ natural beauty.

[10:43 PM, 1/26/2021] නිශාන්ත අයියා:

Diversity of Fauna on and surrounding the rock is much higher than Sinharaja forest.

[11:58 PM, 1/26/2021] නිශාන්ත අයියා:

Yes indeed, nature has won. Atmosphere of the place similar to a tropical rainforest.

Carried a wooden staff and tapped the earth, tree trunks, and bushes to warn-off the resident reptiles before being taken steps as a precaution.

Two king Cobras were residing there and spotted (another) young Cobra quite a recently, by Asitha, Palika and elder son.

[4:31 AM, 1/27/2021] උක්කුං නැන්දා: කිත්සිරි

උඩුපිල ගල.

අනේ! අපි පොඩ් කාලේ සෙල්ලම් කළ ගලට වෙලා තියෙන දේ දැක්කම දුක හිතුනා. ඒ කාලෙ හිටියෙ අහර කුක්කා, හාල්දන්ඩා, ගැරඬ් ව්තරයි.

[8:54 AM, 1/27/2021] රේණුක-ගංගා අක්කා:

අපි පොඩි කාලෙත් ගල උඩ සෙල්ලම් කළා. රෙදි වනන්නේ ගල උඩ. ගල් ඉබ්බෝ හරියට හිටියා.

ගල්වලේ ඉස්ගෙඩි පිරිලා හිටියා. දෙවනියා (නදී) කී පරිදි අක්කපාන ගොඩක් තිබුණා. ඉස්සර මම නිවාඩු දවස්වලට ගල උඩට ගිහින් පාඩම් කරනවා. හරිම නිස්කලංක පරිසරයක් ඒ කාලේ.

[8:55 AM, 1/27/2021] දුශානි නංගි:

මට මතක ගල් වල. ඒකේ ඉසගෙඩි ඇල්ලුවා.

[9:01 AM, 1/27/2021] උක්කුං නැන්දා: කිත්සිරි

අපි එතනදි තමයි ගෙම්බන්ගෙ මුලු ජීවන චක්කරේම දැන ගත්තෙ.

[4:14 PM, 1/27/2021] චන්ද්‍ර නැන්දා:

අනේ අපේ ගල දැක්කම හරි අසා හිතුනා. පුතේ ඔයාට පිං මේ පින්තුර වලට. මට පුදුම ආසාවක් තියෙන්නේ ගල උඩට යන්න. ඔය පරණ කජු වෙන්න බැ. නමුත් ඉස්සර කජු ගහත් ඔය වගේම අතු විහිදිලා තිබුණා. ඒ වයේ උඩ තමයි අපේ සෙල්ලම් ඉස්කෝලේ. ඉස්සර ඔය වගේ කැතට තිබුනේ නෑ. හරි දුකයි දැක්කම. ඔයාට ස්තුතියි මේවා දැම්මට.

2021.04.22 දින ලබා ගත් ඡායාරූප